902. Sú Vigdís Hauks sem sagði að "Strax" væri  teygjanlegt hugtak hefur verið nokkuð áberandi að undanförnu og sett mark sitt á þjóðmálaumræðuna þó það hafi ekki alltaf verið með mjög áferðarfallegum eða jákvæðum hætti.

Hún fór mikinn í morgunútvarpi rásar 2 þann 9. des. sl., en þar sat hún fyrir svörum ásamt Katrínu Júlíusdóttur sem virtist vera ofboðið og lengst af hálf orðlaus vegna þess sem sú fyrrnefnda lét flakka og lái henni hver sem vill.

Fréttamaðurinn spurði Vigdísi Hauksdóttur út í þá furðulegu þversögn að lækka álögur á ríkt fólk en hækka þær á fátækt fólk, skera niður hjá þeim sem síst skyldi, til að mynda hjá fátækasta fólki í heimi,

Hér á eftir eru nokkrar glefsur úr svari Vigdísar.

"Þetta er bara byrjunin sem koma skal hjá nýrri ríkisstjórn.".

"Það voru kosningar í vor og það er mjög óeðlilegt að núverandi ríkisstjórn framfylgi stefnu fyrri ríkisstjórnar".

"Þetta er hluti af því að vinda ofan af þeirri vitleysu sem var í gangi á síðasta kjörtímabili, að setja fjármagn á ranga staði".

"Okkur er að takast að snúa skútunni við".

"Lækkun á útgjöldum til þróunarmála og barnabóta hluti af því að vinda ofan af vitleysu síðasta kjörtímabils".

"Það er okkar að forgangsraða í þá veru að skattféð nýtist sem best og fari á þá staði sem því er best varið".

En hægt er að hlusta á viðtalið á rás 2 í heild sinni ef fylgt er eftirfarandi slóð. http://0dayhotmusic.com/jack-hrafnkell-danielsson/vigd-s-hauks-og-katr-n-j

-

Ban-ki-moon aðalritari Sameinuðu þjóðanna sagði það sérlega aðdáunarvert að Íslenska þjóðin þrátt fyrir erfiða kreppu hefði ekki slegið af í stuðningi sínum við fátækar þjóðir og þá sem minna mega sín í heiminum. Hann sagði einnig að þær gjörðir Íslendinga mættu verða öðrum þjóðum mikil og góð fyrirmynd.

Þ. 21 mars 2013 samþykkti Alþingi aukin fjárframlög til þróunarsamvinnu með öllum greiddum atkvæðum nema einu. Vigdís Hauksdóttir greiddi atkvæði á móti.

Sjá: http://www.youtube.com/watch?v=rRkk1SGqq2g

-

Og það fór ekkert á milli mála að Vigdís vildi verða ráðherra þegar síðasta stjórn var mynduð.

"Ég varð fyrir vonbrigðum því ég sakna þess að það sé ekki ráðherra úr Reykjavík," 

"Það á eftir að skipa einn ráðherra með haustinu og það á eftir að rétta þennan kynjahalla í ríkisstjórninni að mínu mati," 

segir Vigdís í viðtali við DV sem segist hafa sóst eftir því að verða ráðherra.

-

Og hún hafði uppi það sem ýmsir hafa túlkað sem hótanir gagnvart RÚV fyrir að fara aðrar leiðir í fréttaflutningi en henni var þóknanlegt.

Veffréttamiðillinn eyjan.is fjallaði um meintar hótanir þ. 14. ágúst sl.

"Vigdís Hauksdóttir, formaður fjárlaganefndar, er afar ósátt við fréttaflutning RÚV og segir fréttastofuna vinstri sinnaða og halla undir Evrópusambandið. Hún gaf sterklega til kynna að hagræðingarhópur ríkisstjórnarinnar muni leggja til að skorið verði niður í rekstri RÚV. Svo bætti hún við; "Ég er náttúrulega I þessum hagræðingahópi".

Og stjörnulögmaðurinn Sveinn Andri Sveinsson sagði á facebooksíðu sinni.

"Formaður fjárlaganefndar ósáttur við að fréttastofa RUV hafði rangt eftir henni og hótar niðurskurði á fjárveitingum. Þessi ummæli væru mjög eðlileg í Zimbabwe, en það getur ekki verið að Íslendingar hafi þolinmæði gagnvart svo vitsmunaskertum ummælum og grímulausum hótunum. Í siðmenntuðum löndum væri ekki aðeins búið að krefjast afsagnar Vigdísar, heldur væri hún farin frá störfum sem formaður fjárlaganefndar".

Og nú vilja einhverjir meina að hún hafi staðið við hótanirnar.

-

Í morgunþættinu "Bítið" á Bylgjunni þ. 14. ágúst sl. viðraði Vigdís skoðanir sínar á ESB og IPA styrkjunum sem nú hafa verið dregnir til baka.

"Vigdís sagði það skoðun sína að IPA styrkir Evrópusambandsins væru "glópagull". Forstöðumenn ríkisstofnana hafi farið á ferð og flug og farnar hafi verið fjölmargar ferðir til útlanda í tengslum við aðildarumsóknina".

Myndin hér að ofan fylgdi pistli á vefnum http://jack-daniels.is sem hafði að yfirskriftinni "Vont er þeirra ranglæti, en verra er þeirra réttlæti". Þar mátti einnig lesa eftirfarandi:

"Það er deginum ljósara að við sitjum uppi með stjónrmálamenn í rikisstjórnarflokkunum sem hafa ekki einu sinni greind á við mýflugu hvað þá heldur meira.  Þetta fólk, í sjálfsánægju sinni, hroka og heimsku, heldur sig vita allt, kunna allt og geta allt.  Raunin er bara sú eins og áður er sagt að þetta fólk hefur ekki hundsvit á því sem það er að gera og er þjóðinni allri til skaða og háborinar skammar".

Og við megum eiga von á að fá meira af Vigdísi, m.a. í næsta spaugststofuþætti (þó einhverjum þyki reyndar nóg komið af henni í bili), en Pálmi Gests mun leika hana þar sem hún er trufluð án afláts með sms-um frá Vodafone á jólahlaðborði meðan hún reynir að njóta aðventunnar ásamt öðrum framsóknarmönnum. Það hefur reyndar kvisast út að hún verði fyrirferðamikil í næstu þáttum þeirra spaugstofumanna.

-

Eftir því sem meira er kafað ofan í orð hennar og gerðir, verður sú spurning áleitnari hvort finna megi mikið óheppilegri þingmann í sögu Lýðveldisins.

Sá sem þetta ritar telur sig vera alveg sérlega áhugalítinn nú orðið þegar flokkapólitík er annars vegar og hann (áhuginn) fari hratt minnkandi með hverju árinu sem líður, En þegar svona málflutning ber fyrir augu og eyru er erfitt að segja ekki neitt.